Parlamenti Evropian do të miratojë sot, në Strasbourg, raportin e raportueses për Kosovë, Ulrike Lunaçek, për përparimin e Kosovës drejt BE.

Këtë e ka konfirmuar për arbresh.info vetë Lunaçek, njëherit edhe nënkryetare e Parlamentit Evropian.

“Ky votim do të dërgojë edhe njëherë një sinjal të fortë se e ardhmja e një Kosove të pavarur qëndron në Bashkimin Evropian,” shprehet Lunaçek.

Sipas saj, partitë dhe politikanët e Kosovës janë të nxitur që t’i përgjigjen këtij sinjali nga pala e PE në një mënyrë konstruktive dhe frymës evropiane.

Raporti do të shqyrtohet në mbrëmjen e të martës, dhe para raportit për Kosovë, do të shqyrtohet edhe raporti për Serbinë i eurodeputetit David McALLISTER.

Në raport përmendet se pesë shtete anëtare të Bashkimit Evropian ende nuk e kanë njohur Kosovën.

Raporti thekson se njohja do të ishte e dobishme për normalizimin e marrëdhënieve në mes të Kosovës dhe Serbisë.

“Rritë besueshmërinë e BE-së në politikën e saj të jashtme; Merr shënim pozitiv për qasje konstruktive të të gjitha Shteteve Anëtare në lehtësimin dhe forcimin e marrëdhënieve midis BE-së dhe Kosovës në mënyrë që të nxisin zhvillimin socio-ekonomik, sundimi i ligjit dhe konsolidimin demokratik në dobi të popullit të Kosovës,” thuhet në raport.

Ky raport, inkurajon një qasje pozitive në lidhje me pjesëmarrjen e Kosovës në organizatat ndërkombëtare. /arbresh.info/